Saturday, February 16, 2008

പ്രണയ (ദിന) തര്‍പ്പണം...

ഇക്കൊല്ലമാദ്യമായ് കൊന്നപൂത്തു
കൂടെ, ഞൊടിനേരം തെറ്റിയ വേനല്‍മഴയും!
തെക്കേപ്പറമ്പില്‍ പൂവിട്ട മുല്ലയ്ക്ക്
അഞ്ജലീ, നിന്റെ വിയര്‍പ്പിന്‍ സുഗന്ധം!

കാലം വിലയിട്ട സ്വപ്നങ്ങള്‍ നമ്മള്‍ ചേര്‍-
ന്നെഴുതിയ മുറ്റത്തെക്കോണില്‍ നിനക്കായ്
ഉരുളിയില്‍ തുള്ളിത്തിളയ്ക്കും നുറുക്കരി-
ച്ചോറുഞാനൂട്ടാമീ പ്രണയസുദിനത്തില്‍!
........
പെയ്തൊഴിയാത്ത മഴനൂലുകള്‍ നെയ്തൊരാ-
ക്കമ്പളം; കൂരിരുള്‍, ഭൂമിക്ക് കാഴ്ചവയ്ക്കേയന്ന്,
നിലയ്ച്ചിട്ടും മിടിക്കുന്ന മാറില്‍ച്ചേര്‍ന്നേങ്ങുന്ന
ചിന്നുവും, ഞാനും നിനക്കന്യരായി...!

നീ നോല്‍ക്കാത്ത നോയമ്പുകളുണ്ടോ ?
നിന്‍ വിളി കേള്‍ക്കാത്ത ദേവകളുണ്ടോ ?
ജപമന്ത്രധ്വനികളില്‍ നീ നിന്നെ മറന്നോ ?
അതോ, നിനക്കായ് ഞാനൊന്നും പ്രാര്‍ത്ഥിച്ചില്ലേ?
........
മഞ്ഞച്ചില്ലുലഞ്ഞ പാവാടത്തുമ്പിന്‍,
തട്ടേറ്റുറങ്ങുന്ന തൊട്ടാവാടിത്തൈയ്യെ,
കള്ളനെന്നുച്ചെ വിളിച്ച കറുകക്കൊടിയെ
മോതിരക്കെട്ടാക്കി വിരലിലിട്ടു...

വാല്‍ക്കിണ്ടിവെള്ളം തൊട്ടെള്ളും തുളസിയും,
കുഞ്ഞിളംകൈയ്യാലേ തര്‍പ്പിക്കുമുരുളയും
നാക്കിലയില്‍ വച്ചീറന്‍ കൈതട്ടിവിളിക്കും
എന്നേയും, മോളേയും നിനക്ക് കാണാമോ ?

ഇളനീര്‍ത്തറ നെറ്റിതൊട്ടുവന്ദിക്കും,
പൊന്നുമോളറിയുന്നുവോ, തന്നമ്മയെ;
കുന്നോളമാശകള്‍ മനസ്സില്‍ സ്വരുക്കൂട്ടി,
കാറ്റേറിപ്പോയൊരെന്‍ പ്രിയതമയെ...!

16 comments:

Rejesh Keloth said...

പ്രണയദിനത്തിലെ ഒരു വേറിട്ട കാഴ്ച... നിങ്ങള്‍ക്കായ്...

G.MANU said...

മഞ്ഞച്ചില്ലുലഞ്ഞ പാവാടത്തുമ്പിന്‍,
തട്ടേറ്റുറങ്ങുന്ന തൊട്ടാവാടിത്തൈയ്യെ

:)

ഫസല്‍ ബിനാലി.. said...

വരികളാലൊരു താജ്മഹല്‍
ആശംസകള്‍

ഏറനാടന്‍ said...

ഹൃദ്യം.. ലളിതം.. സുന്ദരം.. നന്നായിരിക്കുന്നു..

ഹരിശ്രീ said...

മനോഹരം...

ആശംസകള്‍

ഗിരീഷ്‌ എ എസ്‌ said...

സതീര്‍ത്ഥ്യാ..
നന്നായിട്ടുണ്ട്‌...
അതിമനോഹരമായ വരികള്‍...
എനിക്കായി കോറിയിട്ട അഭിപ്രായത്തിലൂടെ വീണ്ടുമൊരിക്കല്‍ കൂടി കണ്ണോടിച്ചു...ആ സമര്‍പ്പണം ഏറ്റുവാങ്ങിയ മനസിന്റെ നൈര്‍മ്മല്യത്തെ തിരിച്ചറിയുന്നു..ഈ വരികളിലൂടെ കണ്ണോടിച്ചപ്പോള്‍...

ആശംസകള്‍...

മിന്നാമിനുങ്ങുകള്‍ //സജി.!! said...

മനസ്സു മനസ്സുമായി ചേരുമ്പോള്‍ എന്ത് പ്രണയദിനം അല്ലെ..?
അവര്‍ക്ക് എന്നും പ്രണയമല്ലെ..
പ്രണയത്തിനും സ്വപ്നത്തിനും ഇടയിലെ പ്രതീക്ഷകള്‍ക്ക് എന്നും നിലാവിന്റെ സൌന്ദര്യവും.

അപ്പു ആദ്യാക്ഷരി said...

GOOD !

Rejesh Keloth said...

എല്ലാവര്‍ക്കും എന്റെ നന്ദി... ഹൃദയംഗമായ നന്ദി...

ദിലീപ് വിശ്വനാഥ് said...

കൊള്ളാം, നല്ല വരികള്‍.

ഭൂമിപുത്രി said...

വേറിട്ടൊരു വേദന തന്നെപകര്‍ന്നു ഈക്കവിത.

ഗീത said...

മനസ്സു വല്ലാതെ വിങ്ങുന്നു സതീര്‍ത്ഥ്യാ....

ശ്രീ said...

ഈ തര്‍പ്പണം നന്നായി, മാഷേ.
:)

Rejesh Keloth said...

ഇതൊരു യഥാര്‍ത്ഥ കാഴ്ചയായതിനാലാവണം വരികള്‍ വേദന നല്‍കുന്നത്...
വേദനയില്‍ പങ്കുചേര്‍ന്ന എല്ലാവര്‍ക്കും നന്ദി...

Sandeep PM said...

നല്ലത് ... എല്ലാം നല്ലതിനു

വല്യമ്മായി said...

"ചിന്നുവും, ഞാനും നിനക്കന്യരായി"
ഇല്ല മരണമാരേയും അന്യരാക്കുന്നില്ല.:(
വരികള്‍ മനോഹരം എന്നു പറയുന്നില്ല,അതെഴുതുമ്പോള്‍ നിങ്ങളനുഭവിഹ്ച്ക വേദന വായിക്കുന്നവര്‍ മനസ്സിലാക്കാന്‍ കഴിഞ്ഞാല്‍ എഴുത്ത് ലക്ഷ്യം കണ്ടു.